Astrology

శ్రీ గణేశాయ నమః శ్రీ మాత్రే నమః – శ్రీ కృష్ణ పరబ్రహ్మణే నమః శుభ గ్రహ


శ్రీ గాయత్రి వేద విజన్

హన్మకొండ*

గ్రహణ నిర్ణయము: భాగము – 1

ఈ సంవత్సరంలో ఒక సూర్య గ్రహణము మరియు ఒక చన్ద్ర గ్రహణాన్ని చూడబోతున్నాము.

25.10.2022 – మంగళవారం ముచ్ఛమానాస్తమయ (‘ముచ్ఛమాన అస్తమయ’ అనగా సూర్యాస్తమయం పిదప వదిలిపెట్టు) పాక్షిక సూర్యగ్రహణం:

ఇట్టి పాక్షిక సూర్య గ్రహణము ఐరోపా, దక్షిణ/పశ్చిమ ఆసియా, ఉత్తర/తూర్పు ఆఫ్రికా మరియు అట్లాంటిక్ ప్రాంతాలలో కనిపిస్తుంది. ఇది ఎక్కడ కనిపిస్తుందో వారికి మాత్రమే గ్రహణ నియమాలు వర్తిస్తాయి.

*ఆశ్వయుజ అమావాస్య మంగళవారం స్వాతి నక్షత్ర యుక్త – తులా రాశిలో పాక్షిక సూర్య గ్రహణం – కేతు గ్రస్త – కృష్ణ వర్ణం.*

స్పర్శ కాలం: 16:58

మధ్య కాలం: 17:41

సూర్యాస్తమయం: 17:43

మోక్ష కాలం: 18:29

ఆద్యంత పుణ్యకాలం00:45 ని

(ఇట్టి గ్రహణాన్ని స్వాతి నక్షత్ర జాతకులు, తుల, మకర, మేష, వృషభ మరియు కన్యా రాశులందు జన్మించిన వారు వీక్షించ రాదు. వీరు గ్రహణ శాంతి చేసుకోవాలి)

నిత్య భోజనాదులు:

మంగళవారం గ్రహణం రోజున గ్రహణ మోక్ష కాలం వరకు ఉపవసించి, మోక్షకాలానంతరం స్నానదులను ముగించి పచనాదులు చేసుకొని భుజించాలి. ఆబ్దిక మరియు మాసికాదులు గ్రహాణానంతరం స్నాన పచనాదులు చేసుకొని నిర్వహించు కోవాలి (పచన అనగా వంట వండు కొనుట).

దీపావళి నిర్ణయము:

24.10.2022, సోమవారం, చతుర్దశి, సా గం 05:17 ని. –

నరక చతుర్దశి, హారతులు. *‘ఉభయేద్యుః ప్రదోష వ్యాప్తౌ పరైవ గ్రాహ్య’* ఉభయ తిథులందు అమావాస్య ప్రదోష వ్యాప్తి యున్న ఎడల పరదినమును గ్రహించుమని ప్రమాణము. కాని పర దినమున సూర్య గ్రహణము ఉన్నందున పూర్వ దినాన్నే స్వీకరించ వలసి వచ్చింది. ఇది అభిమతము కాకపోయినా కూడాను – సందర్భోచితం మరియు అవసరం. కావున *24.10.2022 నాడే ఉదయం నరక చతుర్దశి హారతులు మరియు సాయంకాలం శ్రీ ధనలక్ష్మి పూజలు*.


కేదార గౌరీ వ్రతం:

25.10.2022, మంగళవారం నాడు గ్రహణ మోక్ష కాలం వరకు ఉపవసించి గ్రహణ మోక్ష కాలానంతరం స్నానాదులు మరియు గృహ శుద్ధి పిదప స్వాతీ నక్షత్ర ప్రయుక్త శ్రీ కేదార గౌరీ వ్రతం. పచనం మరియు భోజనం.

08.11.2022 మంగళవారం – గ్రస్తోదయ పాక్షిక చన్ద్ర గ్రహణం

(ఇట్టి పాక్షిక చన్ద్ర గ్రహణం తూర్పు/ఉత్తర ఐరోపా, ఆసియా, ఆస్ట్రేలియా, ఉత్తర అమెరికా, దక్షిణ అమెరికా దాదాపు పూర్తి భాగం, పసిఫిక్, అట్లాంటిక్, హిందూ మహాసముద్రం, ఆర్కిటిక్ మరియు అంటార్కిటికా ప్రాంతాలలో కనిపిస్తుంది)

*కార్తీక శుద్ధ పౌర్ణమి, మంగళవారం, భరణీ నక్షత్ర యుక్త మేష రాశిలో రాహుగ్రస్త చన్ద్ర గ్రహణం.*

స్పర్శ కాలం: 14:39

మధ్య కాలం: 16:29

సూర్యాస్తమయం: 17:37

మోక్ష కాలం: 18:19

ఆద్యంత పుణ్యకాలం00:42 ని

(ఈ గ్రహణాన్ని భరణీ నక్షత్ర జాతకులు, మేష, వృషభ, కర్కాటక, తులా, వృశ్చిక మరియు మీన రాశులలో జన్మించిన వారు వీక్షించ రాదు. వీరు గ్రహణ శాంతి చేసుకోవాలి)

నిత్యభోజన నిర్ణయము:

గ్రస్తోదయం అగుట వలన పగటి భోజనం చేయరాదు. మోక్ష కాలానంతరం స్నాన పచనాదులు ముగించి భోజనం చేయాలి.

ప్రత్యాబ్దిక నిర్ణయము:

గ్రహణ మోక్ష కాలానంతరం పరదినమున నిర్వహించు కోవాలి.

గ్రహణ శాంతి మరియు గ్రహణ ఫలమ్ రెండవ భాగంలో ప్రచురించ బడుతుంది:

నమిలికొండ విశ్వేశ్వర శర్మ, సిద్ధాంతి

నమిలికొండ విశ్వేశ్వర శర్మ, సిద్ధాంతి
12.10.2022