Astrology

శ్రీ గణేశాయ నమః శ్రీ మాత్రే నమః – శ్రీ కృష్ణ పరబ్రహ్మణే నమః శుభ గ్రహ

18/19.11.2021 నాడు సంభవించు రాహుగ్రస్త పాక్షిక చన్ద్ర గ్రహణం

18/19.11.2021 నాడు రాహుగ్రస్త పాక్షిక చన్ద్ర గ్రహణం సంభవించ నున్నది. ఇట్టి పాక్షిక చన్ద్ర గ్రహణం సంపూర్ణంగా కనబడు లేదా స్వల్పంగా కనబడు ప్రాంతాలు:

ఐరోపా ఖండం అంతయూ, ఆసియా ఖండంలో అధిక భాగం, ఆస్ట్రేలియా, ఉత్తర/పశ్చిమ ఆఫ్రికా, ఉత్తర అమెరికా, దక్షిణ అమెరికా, పసిఫిక్ అట్లాంటిక్ హిందూ మహా సముద్రాలు, ఆర్కిటిక్ ఖండం.

19.11.2021 నాడు సూర్యుడు అస్తమించు సమయంలో సంభవించు గ్రహణాన్ని మనకు భారతదేశంలో మాత్రం ‘ఛాయాబింబ చంద్రగ్రహణం (Penumbral Lunar Eclipse)’ గానే పరిగణించబడింది. తూర్పు ఈశాన్య ప్రాంతాలలో కొంతవరకు కనబడు అవకాశం కలదు. ఆంధ్రప్రదేశ్ రాష్ట్రం తూర్పు భాగంలో, అనగా బందరు పోర్ట్ మొదలు ఆపై భాగాలలో మాత్రమే ఇట్టి ఛాయాబింబ చన్ద్ర గ్రహణం ఉంటుంది. దాని క్రింది భాగాలు రాయలసీమ ప్రాంతంలో ఉండదు. తెలంగాణా తూర్పు ఈశాన్య భాగాలు కొత్తగూడెం, భూపాలపల్లి నుండి ఆ పై ప్రాంతాలయందు అత్యంత స్వల్పంగా ఉంటుంది. భారతదేశానికి ఇది ‘ఛాయాబింబ చన్ద్ర గ్రహణం (Penumbral Lunar Eclipse)’ మాత్రమే. దీన్ని గ్రహణంగా పరిగణించరాదు. అనగా పాక్షిక గ్రహణం సంభవించు నల్లని చీకటి ప్రాంతం యొక్క మసకబారిన నీడ మాత్రమే (దీన్ని ప్రత్యక్షంగా మీరు ఇంట్లో పరీక్షించి చూడవచ్చు. ఒక కుర్చీ పై కాంతిని ప్రసరించే విధంగా చేయండి. దాని నీడను గమనించండి. గాఢమైన అట్టి నీడ ప్రక్కన మసక బారిన మరొక నీడ కనిపిస్తుంది. నిజానికి అది ఆ కుర్చీకి చెందిన నీడ కాదు. గాఢమైన నీడ యొక్క ఛాయ మాత్రమే. దాన్నే గ్రహణాల విషయంలో Penumbra అని ఉంటారు). అందుకే దీన్ని గ్రహణంగా పరిగణించ రాదు. దీని స్పర్శ అస్పష్టంగా ఒక నీడవలె మాత్రమే కనిపిస్తుంది. కావున దీన్ని గ్రహణంగా పరిగణించ రాదు. భారతదేశం మినహా ఇతర ప్రాంతాలలో ఇది ‘పాక్షిక రాహుగ్రస్త చన్ద్ర చంద్రగ్రహణం (Partial Lunar Eclipse). ఇది భారతదేశానికి మాత్రం ‘ఛాయాబింబ చన్ద్ర గ్రహణం (Penumbral Lunar Eclipse)’. ఈ గ్రహ పట్టింపు మనకు లేదు. అందుకే అధికశాతం పంచాంగాలలో దీని గూర్చి వ్రాయ బడలేదు. ఇతః పూర్వం మనకు ఒక ఛాయాబింబ చన్ద్ర గ్రహణం వచ్చినపుడు కూడా ఇదే ప్రస్తావన చేసాను. దయచేసి యూ ట్యూబ్ ఛానల్ లందు వస్తున్న ప్రచారాన్ని నమ్మకండి. ఈ విషయంలో సందేహం ఉన్న ఎడల నన్ను సంప్రదించ గలరు.

నమిలికొండ విశ్వేశ్వర శర్మ, సిద్ధాంతి
14.11.2021